Ti kunkunada: Iti kinaagpaysuanan iti maipadpadamag a panangsarabo kano ti minilyon nga Ilokano ti Rehiyon 1 ken 2 iti BBM-Sara UNITEAM
Ranggo: Saan a pudno
Ti kaagpaysuananna: Maysa a pablaak manipud iti Opisina ni Bongbong Marcos babaen iti media liaison na a ni Maria Pedroche ti naited idi Pebrero 17 kadagiti kameng ti media ken naipablaak iti Maharlika TV (https://maharlika.tv/…/million-ilocanos-welcome-bbm…) ti naikabil kadagiti paulo dagiti damdamag. Naipadamag a binisita ti BBM-Sara UniTeam ti “Solid North” ken napudot kano ti panangsarabo kadakuada.
“Sipaparang a nakasigurado iti maysa a layos a pangabak kadagiti nasao a rehiyon, nagganwat latta ti UniTeam tapno mapan kadagita a lugar tapno ipadanon da ti mensahe da a panagkaykaysa, panakaagas ken rekonsilyason,” kuna ti pablaak.
“Napan ti bunggoy ti UniTeam idiay Siyudad ti Laoag, nu sadinno ket adu a tao ti nagur-uray kadagiri igid ti kalkalsada tapno laeng makita da dagiti rupa dagiti kandidato,” nayon na pay.
“Ti tantiya ti Philippine National Police (PNP) a bilang dagiti tattao ket nasurok maysa a milyon,” kuna ti pablaak. Ngem ti pablaak ket saan na inlanad nu sino nga opisyal ti PNP ti nangibaga iti nasao a nasurok a milyon a tao. Daytoy panangipaganetget da iti milyon ket sobsobra a bilang gapu ta ti populasyon ti Siyudad ti Laoag segun iti datos a naala idi Mayo 2020 ket 111,651.
Naisurat pay iti pablaak dagiti dadduma pay a paset ti Ilocos Norte a pinasyar ti bunggoy. Ngem manen, ti opisyal a listaan ti bilang ti populasyon ti Ilocos Norte idi 2020 ket 620,000 laeng.
Santo nu amirisen ti kinabara na ti klima iti dayta nga aldaw ti Pebrero nga kumurang 30 degrees, saan a kapapati nga mapan agbabad dagiti amin nga umili idiay kalsada tapno laeng ited ti napudot a panagsarabo iti UniTeam.
Segun pay ti pablaak nga immunan a napan ti bunggoy idiay Iguig, Cagayan tapno makidar-ay iti maika-98 a panagkasangay ni Juan Ponce Enrile.
Agpayso nga doble ti populasyon ti Cagayan mgem nu Ilocos Norte, addan laeng nasurok 30,000 nga umili ti Iguig.
Ti pablaak ket naiwaras sakbay iti panagturong ti UniTeam idiay Ilocos Sur nga addaan laeng opisyal a populasyon a 706,000.
Nalawa nga imahinasyon ti panangibaga nga adda minilyon nga Ilokano a nakalinya iti kalkalsada para iti UniTeam.
ADVERTISEMENT
