Ti kunkunada: Naaramid kano ti NAIA idi panawen ni Presidente Ferdinand E. Marcos
Ranggo: ULBOD
Dagiti datos: Nangipila ni Congressman Arnolfo Teves Jr. a representatibo ti Negros Oriental 3rd District ti maysa a singasing a linteg a House Bill 610 nu sadinno ket mabaliwan ti nagan ti Ninoy Aquino International Airport (NAIA) iti Ferdinand E. Marcos International Airport.
Kuna ni Teves: “Usto lang nga inagan daytoy iti tao nga nangited kontribusyon iti kapanunotan ken panangipatungpal iti natan-ok a proyekto.”
Kunana pay a “naaramid kano ti pagpatayaban ti eroplano iti panawen ti kinapresidente ni Ferdinand Marcos Sr.”
Segun iti Official Gazette of the Philippines, ti konstruksiyon ti pagpatayaban ti eroplano a managan idi ti Manila International Airport, ket nagrugi idi 1947 idi presidente ni Manuel Roxas. Ti internasyunal a kalsada a pagpatayaban na ket nakumpleto iti termino ni Elpidio Quirino idi 1953.
Nagtugaw kas presidente ni Marcos Sr. kalpasan ti sangapulo ket dua (12) a tawen idi 1965. Nausar a kas komersiyal a pagpatayaban ti eroplano ti Philippine Aerial Taxi Company (iti maudi ket Philippine Airlines) iti dekada 1930. Idi 1937, nanaganan a kas Manila International Air Terminal.
Inlanad pay ti opisyal a pagiwarnak ti Manila International Airport Authority nga nagbalin pay a base ti United States Air Force base agingga a naipaima iti Gobyerno ti Pilipinas idi 1948, ken iti dayta a panawen, addaan lang ti lokal a pagpatayaban weno runway ken bassit a terminal a pampasahero.
Idi kalpasan ti panakakumpleto ti intenasyunal a pagpatayaban idi 1953, nagrugi ti pagpatayaban nga agserbisyo iti internasyunal a biyahe a kas Manila International Airport.
Idi 1961, naipatakder ti control tower ken ti pasdek ti terminal nga eksklusibo para kadagiti internasyunal a biyahe.
Manen, dagitoy ket sakbay pay a nagbalin a presidente ni Marcos Sr. idi 1965.
Nanaganan lang ti Manila International Airport a kas Ninoy Aquino International Airport idi 1987 babaen iti Republic Act 6639 kas panagbigbid iti dati a Senador a Ninoy Aquino. Ni Ninoy ket napapatay iti nasao nga airport idi panawen ti diktaturya ni Marcos idi 1983. Uray pay saan a ni Ferdinand Marcos Sr. ti nangplano iti asasinasyon, adda latta biang na iti krimen. Ken ti pammapatay iti airport ti nangpasged iti panakidangadang a nagbalin a gapu iti panakapatakyas kadagiti pamilya Marcos idi 1986.
Apay nga ammuen tayo ti pudno: Nu ti panggep ni Congressman Teves ket ti nalawag nga ubbaw a panangitan-ok ken Marcos iti panakaaramid ti airport, ti pagbanagan na lang ket ti panakaipabasol manen ken Marcos ti pannakapapatay ken Benigno Aquino, banag a saan a kayat dagiti Marcos.
Original fact-check: https://thebaguiochronicle.com/…/fact-check-naia-was…/
ADVERTISEMENT
